Жалал-Абад шаардык аймактык шайлоо комиссиясынын мүчөсү Насыйкат Калымбетованын берген маалыматына караганда, кечээ 2-декабрда АШК кезексиз жыйынга чогулуп, “Ата-Журт”, “Өнүгүү”, жана “Ата Мекен” партияларынан келген: “КСДП партиясы гендердик балансты сактаган эмес жана айрым талапкерлердин документтери туура топтолгон эмес” деген доо арызды карашкан.

Н.Калымбетованын сөзүнө караганда, кезексиз жыйында Аймактык шайлоо комиссиясынын төрайымы Бактыкан Нуралиева кеткен кемчиликтерди мойнуна алып, мыйзам бузуучулук бар экенин жокко чыгарган эмес жана өз арызы менен төрайымдыктан кеткен.

- КСДП партиясын каттап атканда төрайым жоопкерчиликти өзүнө алган. Бизге ал документтерди көрсөткөн эмес. Эгерде, башында эле биз дагы тизмени карап, документтерин кошо текшеришкенде мындай катага жол бербейт болчубуз. Төрайым карагандан кийин, биз ал документтерди караганга укугубуз жок болчу. Жыйында төрайым бардыгын мойнуна алып жаткандан кийин, аймактык шайлоо комиссиясынын бардык мүчөлөрү тең, партиянын тизмесин жокко чыгарууга макул болдук. Протоколго төрайым кол коюдан баш тартты. Жалал-Абад шаардык аймактык шайлоо комиссиясынын чечимин БШКга жибердик. Биздин чечимди алар карап чыгып, өз бааларын беришет, - дейт Н.Калымбетова.

Эскерте кетсек, 11-декабрда өтө турган Жалал-Абад шаардык кеңешинин шайлоосуна 7 саясий партия катышууда. Шаардык кеңеште 31 депутаттык орун бар.