Президент Алмазбек Атамбаев Кылмыш кодексине киргизилген өзгөртүүлөрдү жактырды. Ага ылайык, балдарга ырайымсыз мамиле кылуу, ден соолугуна зыян келтирүү, мазактоо жана өз жанына кол салууга жеткирүү үчүн каралган жазалар күчөтүлөт. Бул тууралуу мамлекет башчынын басма сөз кызматынан билдиришти.

Документке тиркелген негиздеме-маалымкатта балага ырайымсыз мамиле кылуу үчүн кылмыш жоопкерчилигине анын ата-энеси же аны тарбиялоо милдети жүктөлгөн адамдын тартыла тургандыгы жазылган. Алсак, жашы жете элек баланы өз жанын кыюуга чейин жеткирүү, ырайымсыз мамиле жасоо же мазактоо үчүн 2 жылдан 5 жылга чейинки мөөнөткө эркинен ажыратуу каралган. Ушундай эле кылмыштар ымыркайларга карата жасалган болсо, күнөөлүлөр 3 жылдан 7 жылга чейин камалышат.

Ошондой эле баланын өмүрүнө коркунуч жараткан же оор кесепеттерге алып барган зыян келтирүүлөр үчүн 6 жылдан 10 жылга чейин эркинен ажыратуу жазасы каралган.

Өмүргө коркунуч жаратпаган зыян келтирүүлөр үчүн 40 миңден 70 миң сомго чейинки өлчөмдөгү айып төлөтүү же 2 жылдан 3 жылга чейин эркинен ажыратуу жазалары каралган. Ошондой түрдүү жагдайларга жараша 3 жылдан 5 жылга чейин да соттолушу мүмкүн.