Жалал-Абад шаарында 1956-жылдан баштап балдарга музыка жактан билим берип келе жаткан Глинка атындагы музыкалык мектеп 60 жылдык мааракесин  чоң концерт берүү менен белгиледи. Бул тууралуу шаардык мэриянын басма сөз кызматы билдирди.

Алынган маалыматка караганда, маарекелик салтанат Барпы атындагы драма театрында өтүп, ага облустун ар тарабынан коноктор катышты. Салтанатка келген көрүүчүлөр балдар тарабынан аткарылган музыкалык  күүлөргө күбө болушуп, дүйнөлүк жана улуттук классикалык чыгармаларды угушту.

2014-жылдан бери аталган мектепти жетектеп келе жаткан Кымбат Бердалиеванын айтымында, бул мектеп миңдеген музыканттарды тарбиялап чыгарды.

- Азыркы учурда 320 бала музыкалык билим алса, аларга 25 мугалим талбай билим берип келет. Биздин мектепте элдик, классикалык жана теориялык болуп, үч бөлүм иш алып барууда. Бул жерден бүткөн окуучулардын бир тобу  чет өлкөгө чейин аты угулуп, эмгектенип келе жатышат. Биздин балдар жыл сайын республикалык деңгээлдеги кароо-сынактарга катышып, байгелүү орундарды багындырышууда. Учурдан пайдаланып жергиликтүү шаардык бийликке, ата-энелерге көрсөтүп жатышкан колдоолору үчүн терең ыраазычылыгымды айтам, - дейт ал.

Салтанаттын жүрүшүндө ар кайсы деңгээлдеги жетекчилер, коноктор мектеп жамаатына куттуктоолорун айтышып, балдар менен кошо акылмандын жети шамын жагышып, жашообуз ар дайым жарык болсун деп ниет кылышты.

"Чоң концерт учурунда балдардын комузчулар ансамбли тарабынан чертилген Коргол Досуевдин  “Ак бакай” күүсү залдагы меймандардын купулуна толуп, бүтүндөй зал ордунан туруу менен көпкө чейин кол чапты", - деп билдирет шаардык мэриянын басма сөз кызматы..