Forbes журналы түзгөн тизмеге ылайык, “Газпром” башкармалыгынын төргасы Алексей Миллер экинчи жолу өтө жогору акча төлөнгөн Орусиядагы топ-менеджерлердин ичинен биринчи орунга чыкты. Экинчи орунда “Ростнефтинин” башчысы Игорь Сечин турат.

Басылманын берген баасына караганда, 2015-жылы Миллер сый акы катары 17 миллион 700 миң доллар алган. Сечин болсо 13 миллион доллар тапкан. Буга чейин “Ростнефтинин” басма сөз катчысы Михаил Леонтьев Forbes журналынын берген баасын “сандырак” деп атаган. Үчүнчү катарды “Сбербанк” башкармалыгынын төрагасы Герман Греф толуктайт. Анын сый акысын Forbes 11 миллион доллар деп баалаган.

ВТБ банкынын президенти жана башкармалыктын төрагасы Андрей Костин өткөн жолу экинчи орунда болсо, бул сапар рейтинг тышында калды. Forbes анын сый акысынын көлөмүн атаган жок, себеби банк маалыматтарды берген эмес.

Журналдын рейтингине 25 топ-менеджер киргизилген. 2016-жылкы тизмеде Орусия темир жол компаниясынын мурдагы башчысы Владимир Якунин, "Русгидронун" мурдагы жетекчиси Евгений Дод, "Башнефтинин" мурдагы башчысы Александр Корсик жок.

Журнал белгилегендей, тизмеде көрсөтүлгөн бардык топ-менеджерлердин сый акысы жыл ичинде жалпы жонунан бир жарым эсеге кыскарып, 147 миллион долларды түзгөн. Басылма бул рейтингди беш жылдан бери аныктап келет, бул аралыкта төлөмдөр 2,3 эсеге төмөндөгөн, рубль дагы дал ушундай көрөткүчтө кунун жоготкон.