Жаштарды террордук топторго социалдык түйүндөр аркылуу азгыруу уланып жатканы айтылууда. ИИМдин 10-бөлүмү мындай азгырууларга каршы атайын кибер кылмыштар менен күрөшүүчү топ иштеп жатканын белгилөөдө. Адистер кыргызстандыктар көп кирген Фейсбук, Одноклассники сайттарында экстремисттик деп таанылган "Хизб-ут Тахрир", "Ислам мамлекети" топторунун катарына азгырып, алардын ишмердүүлүгүн кеңири чагылдырган баракчалар тынымсыз иштеп жатканын белгилешүүдө.

Фейсбук баракчасындагы “Хизб-ут Тахрир Түркистан” деген баракча маалыматтарын жалаң кыргыз тилинде таркатат. Баракча күнүмдүк окуялар тууралуу кабарларды уюмдун максатына ылайыктап даярдайт. Алсак, 21-ноябрда Ак үйдүн алдына электр жарыгы жок отурган жаңы конуштун тургундары нааразылык акциясын уюштуруп, электр энергиясына туташтыруу талабын коюшту. Бул маалыматты аталган баракча "ислам дини өкүм сүргөн убакта электр энергиясы ар бир жарандын үйүнө жеткирилип, өз баасында гана сатылат" деген үгүт сөздөрү менен кошо берди.

Террордук жана тыюу салынган экстремисттик топторго жаштарды тартуу социалдык тармактарда ачык эле жүрүп жатканын Орусияга тиешелүү Вконтакте жана Одноклассники сайттарынан да көрүүгө болот. Мисалы, Одноклассники сайтында түрдүү тилдерде мусулмандарды жихадга чакырган баракчалар өкүм сүрүп келет.

Диний радикалдашуу жаатында изилдөө жүргүзүп келген Орусия ИИМ академиясынын докторанты Бакыт Дубанаевдин айтуусунда, террорчуларга катардагы сабатсыз согушкерлерден тартып, кесипкөй адистерге чейин керек. «Ал жакта аябай дасыккан психологдор отурушат. Алар өздөрүнө керектүү адамдарды социалдык тармактардан иликтеп, табышат да, түрдүү жолдор менен аларды азгырышат. Террорчуларга курал кармап согушууга жарай алган сабатсыз согушкерлерден башка, сабаттуу, динди да, демократияны да жакшы билген адамдар да керек. Мисалы, аларга 2013-14-жылдары мунайды казып, кайра иштетүүнү өздөштүргөн адистер зарыл болуп, аларды да оңой эле таап алышты», - деп эсептейт ал.

ИИМдин басма сөз катчысы Бакыт Сеитовдун билдиргени боюнча, мекеменин 10-башкаралыгында атайын киберкылмыштар менен күрөшүүчү бөлүм бар. Ал бөлүм аркылуу тыюу салынган топтордун ишмердүүлүгү көзөмөлдөнүп, алардын ачкан сайттары, баракчалары жабылып, жок кылынып турат. Бирок көбүнчө кайра эле сайт түзүп, Кыргызстандан тыш жактан туруп алып, ишмердүүлүгүн уланткан учурлары көп болууда.

"Эгер андай сайттардын модераторлору Кыргызстандын аймагында болсо алардын кайсыл жерде экенин аныктап, тиешелүү чараларды көрүү мүмкүндүгү бар. Бирок көбчүлүк учурларда алар чет өлкөлөрдө туруп алып иштешет, өз кезегинде бул бөлүмдүн ишин оорлотуп, сайттарды жабуу мүмкүн болбойт. Андай учурларда сайттын контентинин биздин өлкөдө жайылбашы үчүн чаралар көрүлөт», - деп кошумчалады ал.