Жалал-Абад шаарындагы Экономика жана ишкердик университетинде  23 жылдан бери окутуучу, илимпоз жана жетекчи катары үзүрлүү эмгеги, жергиликтүү экономиканын ырааттуу өнүгүүсүн камсыздоого кошкон салымы үчүн аталган окуу жайдын ректору Абдилбает Мамасыдыковго “Сузак районунун Ардактуу атуулу” наамы ыйгарылды.

Окуу жайдын кесипке багыт берүү жана коомчулук менен байланышуу бөлүмүнүн  башчысы Таштанбек Мамытовдун айтымында, Экономика илимдеринни доктору, профессор Мамасыдыков Абдилбает Асановичке Сузак районунун жергиликтүү кеңешинин депутаттарынын кошмо жыйналышынын 2016-жылдын 27-сентябрындагы №64 токтому менен райондун социалдык экономикалык өнүгүүсүнө кошкон салымы үчүн “Сузак районунун Ардактуу атуулу” наамы ыйгарылган. Бул наам анын илимий изденүүлөрү, экономикалык иш-аракеттер боюнча консультатциялык ишмердиги, эл чарбасы үчүн жогорку квалификациялуу кардрларды даярдоодогу жеке эмгеги жогору бааланып берилген.

Ал эми Абдилбает Мамасыдыковдун айтымында, окуу жай түптөлгөн күндөн тарта бүгүнкү убакытка чейин өлкө, коңшулаш  жана бир катар алыскы өлкөлөр үчүн 11 миңден ашуун кесипкөй  адистер даярдалып чыгарылган. Бул адистердин көпчүлүгү ар бир тармакта өлкөнүн өнгүшү үчүн эмгектенип келе жатышат.

- Сузак районунун жергиликтүү бийлиги тарабынан бир эле мага эмес, биздин окуу жайга ыйгарылып жаткан чоң ишеним жөнүндө айта турган болсок,  аталган  райондун үч миңден ашуун улан-кыздары биздин окуу жайдан билим алышкан жана алардын көпчүлүгү учурда райондун социалык-экономикалык өнүгүүсүнө өз салымдарын кошуп келишүүдө, - дейт А.Мамасыдыков.