Арадан 1 ай өткөндөн кийин, эки мамлекеттин ортосундагы Өкмөттөр аралык дипломатиялык мамилелердин натыйжасында жана аны менен бирге эки өлкөнүн укук коргоо органдарынын сүйлөшүүлөрдүн натыйжасында19-ноябрь күнү 20:30 дар чамасында Өзбек республикасынын чек ара кызматкерлери Аксы районунун Курулуш айылынын тургуну Акылбек Боронбаевди жана жылкыларын Ала-Бука районунда жайгашкан “Баймак” чек ара тозотунан өткөзүп беришти.

Жалал-Абад ОИИБнын басма сөз кызматынын берген маалыматына караганда, жылкычы Акылбек Боронбаев Аксы районундагы Киндик-Таш участкасында мал сарайда мал жандык менен алектенип жашаган.  21-октябрь күнү жылкылары жайытта жүрүп Сөгөт-Сай участкасы аркылуу  коңшу Наманган облусунун Хазрати-Шах участкасына өтүп кеткен. Жылкычы артынан кирип кайтарып чыгуу максатында чек арадан жылкылары менен кошо Өзбекстан чек арачыларына кармалган болчу.

2016-жылдын 10 ай ичинде Жалал-Абад облус аймагынан Өзбек Республикасынын аймагына жалпысынан 162 баш мал жандыктары кирип кеткен, алардын ичинен 53 жылкы жана 109 майда мүйүздүүлөр. Ал эми кирип кеткен 162 баш мал жандыктардын ичинен 148 баш мал кайтарылган. Алардын ичинен 49 жылкы 99 майда мүйүздүүлөр.

Жогорудагы фактылар боюнча мал жандыктар Аксы районунун аймагында талаада жүрүп кирип кетишкен, кирип кеткен мал жандыктары Аксы районунун Өзбек Республикасынын жергиликтүү бийлик өкүлчүлүктөрү тарабынан жүргүзүлгөн сүйлөшүүлөрдүн негизинде кайтарылган.

“Жалал-Абад облусунун башка райондорунан Өзбек Республикасынын аймагына мал жандыктар өтүп кеткен фактылар жок. Бирок ага карабастан жергиликтүү жарандарга (айрыкча чек арага тилкеш жайгашкандарга ) өз мал жандыктарын кароосуз жайыттарга калтырбоону эскертебиз”, - деп билдирет ОИИБнын басма сөз кызматы.