Жалал-Абад шаарындагы «Ариет» балдар чыгармачылык борбору тарабынан уюштурулган мектептер арасындагы «Биз Манастын урпактарыбыз» аттуу сынак жыйынтыкталып, манасчылыктан жеңип чыккан окуучуларга сый көрсөтүлдү. Бул тууралу аталган борбордун директору Жыпар Аманкулова билдирди.

Анын айтымында, аталган сынак шаардагы мектептер арасында 9-ноябрдан башталган болчу. Анын негизги максаты – улуттук дөөлөттөрдү, маданий көөнө мурастарды келечек муундарга сиңирүү, туура жол көрсөтүү. Ошондой эле “Манас” эпосун жайылтуу менен жаш манасчылардын катарын көбөйтүү.

- Негизгиси биздин баатырыбыз, жолборс билек Манас атабызды унутта калтырбоо, мекенчилдикке тарбиялоо ушул иш-чарадагы биздин максатыбыз болуп калды. Сынакты жарыя кылган соң ага 500 бала катышты, алардын ичинен тандалып олтуруп, жыйынтыгында баш байгени №10 мектептен 2 окуучу, ушундай эле байгени №3 мектептин бир окуучусу багындырды, - дейт ал.

“Сынактын жыйынтыгын чыгаруу аземине шаардын вице-мэри Айзат Раматиллаева катышып, жаштарга ийгилик каалады. Андан соң, жаш манасчыларга шаардык билим берүү тарабынан баарына бирдей белектер тапшырылды”, - деп билдирет шаардык мэрияын басма сөз кызматы.