Жалал-Абад шаарынын мэриясынын аткаруу комитетинин кезектеги жыйынында атайын орто окуу жайларынын жана кесиптик лицейлердин ишмердүүлүктөрү тууралуу маселе каралмакчы.  Буга карата мэриядан түзүлгөн атайын комиссия курамы бардык окуу жайларында болуп, абал менен таанышып чыгышты. Бул тууралуу шаар мэриясынан билдиришти.

Шаардын вице-мэри Айзат Раматиллаеванын айтымында, жылдын башында атайын орто окуу жайларынын жана кесиптик лицейлердин ишмердүүлүктөрү тууралуу маселе аткаруу комитетинин кароосуна киргизилген. Ошого карата атайын түзүлгөн текшерүүчү топ бардык окуу жайларындагы абал менен кеңири таанышып, тактамалар даярдалды.

- Негизги максатыбыз студенттердин билим сапатын, сабакка болгон жетишүүсүн, жаштардын коомдук жана маданий иш-чараларга катышуусун, окуу жайындагы түзүлгөн шарттар талапка ылайык келеби же жокпу, деги эле жалпы ишмердүүлүгүн карап чыгып, тийиштүү сунуш-пикирлерибизди берүү жана айрым жагдайларын аткаруу комитетинин кароосуна алып чыгуу болуп саналат. Биз жаштардын терең билим жана татыктуу тарбия алуусуна кызыкдарбыз, - дейт ал.

Эскерте кетсек, буга чейин шаар мэриясынын аткаруу комитети өз жыйындарында жогорку жана атайын орто окуу жайларындагы окуу-тарбия процессинин абалы тууралуу маселелерди карап, тийиштүү токтомдорду кабыл алган.