Туркияда жана Россиянын Казан шаарында өткөрүлгөн спорттук мелдештерде ийгиликтерди жараткан спортчуларды Кыргыз Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев жана шаар мэри Салайдин Авазов баштаган жергиликтүү бийликтердин, коомчулуктун өкүлдөрү  облустук Токтосун Тыныбеков атындагы филармонияда салтанаттуу түрдө тосуп, аларга сый-урмат көрсөтүштү.

Шаардык дене тарбия жана спорт бөлүмүнүн башчысы Адыл Бакировдун айтымында, Туркияда 26 мамлекеттин студенттеринин арасындагы өткөн дүйнө биринчилигинде спорттун грек-рим күрөшү боюнча жеңишке Асан уулу Эсен жана Россиянын Казан шаарында өткөрүлгөн мелдеште спорттун алыш күрөшү боюнча коло медалына Шаршенаалы уулу Мааданбек ээ болушкан.

-2016-жыл Жалал-Абад шаарынын спорт тармагында чоң бир ийгиликтүү жыл болду десем жаңылышпайм. Өлкөдө жаштар арасында 8 жылдан бери дүйнө чемпиону болбой келген болсо, ушул жылы Францияда өткөрүлгөн дүйнө биринчилигинде Кыргызстандан эки спортчу биринчиликти алды, алардын бири Жалал-Абад шаарынан. Алдыңкы орундарды багындырган спортчуларыбызды бүгүнкүдөй салтанаттуу тосуп алуу менен бирге өсүп келе жаткан жаштарды спортко болгон кызыгуусун күчөтүү – негизги максатыбыз, - дейт ал.

Спортчуларды тосуп алуу салтанатында сөз сүйлөгөн шаар мэри Салайдин Авазов аларды жеңиши менен куттуктап, буга чейинки дүйнөлүк мелдештерде алдыңкы орундарды багындырган спортчуларга жергиликтүү бийлик тарабынан жыл аягына чейин материалдык сый-урмат көрсөтүлөрүн белгиледи.