Жалал-Абад шаарында мектептердин окуучуларынын, атайын орто кесиптик билим берүүчү жана жогорку окуу жайларынын студенттеринин жана ошондой эле каалоочу командалар арасында 1-декабрь - Бүткүл дүйнөлүк СПИД илдетине каршы күнүнө карата 29-ноябрда “Биз СПИД илдетине жана баңгизаттарга каршыбыз” аталышындагы кароо-сынак өткөрүлмөкчү. Бул тууралуу  шаар мэриясынын социалдык маселелер боюнча башкы адиси Гулина Базаркулова билдирди.

Анын айтымында,  жаштар арасында мындай сынактарды өткөрүү менен ВИЧ/СПИД илдетин алдын алуу боюнча маалыматтарды жеткирүүнүн натыйжалуулугуна жетишүү жана ВИЧ илдетинин алдын алуу боюнча жаштар жана жалпы эле калк арасында пропаганда ишин күчөтүү максаты коюлган.

Жалал-Абад облустук СПИДдин алдын алуу жана ага каршы күрөшүү борборунун башкы дарыгери Элмира Сатарова 2016-жылы шаарда 13 адам СПИД илдети менен катталса, алардан үчөө 14 жашка чейинки өспүрүмдөр экенин, бүгүнкү күндө шаарда жалпы 229 адам СПИД илдети менен оорулуу деп катталганын айтат.

Эскерте кетсек, шаарда 1-декабрь - Бүткүл дүйнөлүк СПИД илдетине каршы күрөшүү күнүнө карата “Адам укуктарынын жалпы жеткиликтүүлүгү” урааны астында бир айлык акция жарыялаган.