Бүгүн, 16-ноябрь күнү Кыргыз Өкмөтүнүн Жалал-Абад облусундагы ыйгарым укуктуу өкүлчүлүгүндө КР жергиликтүү жамааттардын күнүнө карата жыйын болуп, ага өкүлдүн орун басары Бактыбек Анаркулов, КР Өкмөтүнө караштуу жергиликтүү өз алдынча башкаруу иштери жана этностор аралык мамилелер боюнча мамлекеттик агенттиктин директорунун кеңешчиси Өмүрбек Алманбетов катышты.

Жыйында Ө.Алманбетов сөз алып, анда чогулгандарды жергиликтүү жамааттардын кесиптик майрамы менен куттуктап, иштерине ийгиликтерди каалады. Андан кийин, Агенттиктин ведомстволук сыйлыктары менен сыйлоо жөнүндөгү буйрукка ылайык, жергиликтүү жамааттардын күнүнө карата жана жергиликтүү өз алдынча абашкаруунун өнүгүүсүнө, элдердин  достугун, биримдигин чыңдоого кошкон салымдары үчүн облустун аймагындагы бир нече айыл өкмөттөрдүн башчыларын, айылдык кеңештердин төрагаларын “КР жергиликтүү өз алдынча башкаруунун мыктысы” төш белгиси менен сыйлады.

Ошондой эле, КР Өкмөтүнө караштуу жергиликтүү өз алдынча башкаруу иштери жана этностор аралык мамилелер боюнча мамлекеттик агенттигинин ведомстволук  Ардак  грамотасын Аксы районунун Кызыл-Туу айыл өкмөтүнүн иш кагаздарын жүргүзүүчү адиси  Гүлүмкан Айтназарова жана Жалал-Абад шаардык мэриясынын алдындагы “Курманбек” аймактык башкаруусунун жооптуу катчысы Наргиза Эргашева алышты.

Жергиликтүү жамааттардын кесиптик майрамына карата Агенттик тарабынан республика боюнча 80ге жакын сыйлыктар берилсе, анын ичинен Жалал-Абад облусунан 15 адамга сыйлыктар тапшырылды.