Жалал-Абад шаарында 10-ноябрдан 17-ноябрга чейин жарыяланган жаштар жумалыгынын алкагында жогорку жана орто кесиптик билим берүү окуу жайларынын студенттеринин катышуусу менен шаардагы ондон ашуун борбордук көчөлөрүндө тазалык акциясы өткөрүлдү. Бул тууралуу шаардык жаштар иштери боюнча комитетинин төрагасы Байышбек Ташбаев билдирди.

Анын айтымында, жарыяланган жумалыктын алкагында шаар жаштарынын катышуусу менен бир катар акциялар өткөрүлүп жатат. Аларга шаар жаштары активдүү катышышууда.

-Бүгүн да тогуз окуу жайдын студенттеринин катышуусунда тазалык акциясын өткөрүп жатабыз. Мындагы негизги максат – студенттерди шаардын тазалыгын сактоого, шаардын активдүү патриотторунан болууга чакыруу болуп саналат. Мындай тазалык акциясы жаштар иштери боюнча комитетинин уюштурусу менен мурда да болуп келген, - дейт ал.

Тазалык акциясына катышкан Жалал-Абад мамлекеттик университетинин студенти Элиза Усенованын айтымында, учурда жаштар гана эмес улгайган адамдар да текебердиктен, маданиятсыздыктан улам көчөлөрдөгү тазалыкка кайдыгер карашат. Жаштардын  мындай тазалык акциясы дагы да өткөрүлө берсе шаардыктардарга өз өрнөгүн берет.