Жалал-Абад шаарынын мурда гүл эгилбеген көчөлөрүнө биринчи жолу гүлдөр эгилип, шаар ого бетер көркүнө чыга баштады. Бул тууралуу маалыматты Жалал-Абад шаардык көрктөндүрүү жана жашылдандыруу чарбасынын жетекчисинин орун басары Канатбек Жолдошбаев билдирди.

Анын айтымында, буга чейин “Спутник” кичи районундагы Манас, Тарсус көчөлөрүнө бир да жолу гүлдөр эгилген эмес эле. Быйылкы жылы ошол жерлерге роза гүлүнүн түрлөрү отургузулду. Андан сырткары, Осмонов көчөсүнө биринчи жолу газон өстүрүлүүдө.

- Аты аталган жерлерде биздин кызматкерлер гүлдөрдү отоп, чаап, суугарып, тынымсыз иш алып барышууда. Шаарга жалпысынан гүлдөрдүн жети түрү отургузулду, -дейт К. Жолдошбаев.