11-ноябрь күнү Ошто “Енкаунтер” интеллектуалдык спорттук оюну болуп өттү.  Бул тууралуу Ош шаардык жаштар иштери боюнча комитетинен билдиришти.

Оюн 10-ноябрь-Эл аралык жаштар күнүнө, 17-ноябрь Эл аралык студенттер күнүнө карата түзүлгөн “Жаштардын 7 күндүгү” акциясынын алкагында уюштурулуп жатат. Оюнга Оштогу жогорку жана атайын орто окуу жайларынан түзүлгөн командалар катышууда.

“Енкаунтер” интеллектуалдык оюндун шартына ылайык, уюштуруучулар тарабынан, Ош шаарында жайгашкан тарыхый жайларда атайын код жашырылган. Ал эми командаларга код жашырылган жай туурасында суроо берилгенде, жообун тапкандар ошол жайга барып, жашырылган кодун табууга тийиш.

“Ошондуктан оюндун негизги максаты - Ош шаарында жайгашкан тарыхый жайларды жаштарга таанытуу менен интеллектуалдык деңгээлин жогорулатуу болуп саналат” – деди Ош шаарынын жаштар комитетинин төрагасы Суербек Аманиллаев.

Оюн кечке чейин ойнотулуп, жыйынтыгында жеңген командага 10 миң сом акчалай сыйлык жана катышучуларга баалуу белектер берилди.