КР Өкмөтүнүн Жалал-Абад облусундагы ыйгарым укуктуу өкүлчүлүгү Эл аралык уюмдардын каржылоосу менен 3-жолу жаңгак фестивалын өткөрдү. Бул тууралуу өкүлчүлүктөн билдиришти.

Алынган маалыматка караганда, анда токой чарбаларда өндүрүлгөн продукциялар жарманкеге коюлуп, токой жемиштерин кайра иштетүү багытында талкуулоо өткөрүлдү. Фестивалга облустагы токой чарбалардын, жергиликтүү бийликтин жана эл аралык уюмдардын өкүлдөрү катышты.

Негизинен Жалал-Абад облусунда өскөн жаңгактардын маңызы  чет өлкөлөргө экспорттолот. Быйыл 3-жолу уюштурулуп жаткан фестивалдын максаты – жаңгак токойлорунун көйгөйлөрүнө коомчулуктун көңүлүн буруу жана токой пайдалануучуларынын мүмкүнчүлүктөрүн жогорулатуу  болуп саналат.

Айлана-чөйрө жана токой чарба агенттигинин Жалал-Абад аймактык  башкармалыгынан алынган маалыматка караганда, бүгүнкү күндө облусубуздун токой фондунун жалпы аянты  - 737 миң 734 гектарды түзөт. Анын ичинен 35 миң гектары жаңгак токойлору. Жылына жаңгак токоюнан 10 миң тоннадан ашык жаңгактын маңызы өндүрүлөт.

Жалал-Абад облусунда 15 токой чарба жана 4 өз алдынча токойчулук иш алып барат. Аларда 16 миңден ашык үй-бүлө токой аянттарын ижарага алып иштетет. 2013-жылы жаңгактын түшүмдүүлүгү көп болуп, жаңгактын 2 миң тонна маңызы чет өлкөгө экспорттолгон. Ал эми 2014-2015-жылы түшүмдүүлүк аз болгон. Ошого байланыштуу 450 тонна гана жаңгак эскпорттоого жетишилген. Быйылкы жылдын эсебинен 140 тонна жаңгак эскпорттолду.

Эскерте кетсек, облуста 200дөн ашык токой пайдалануучуларынын катышуусунда “Кыргыз токой байлыгы” кооперативи уюшулуп, анын негизинде акыркы жылдары Голландияга миң тоннага жакын жаңгактын маңызы экспорттоло баштады.