Жалал-Абаддагы мурда экс-президент К. Бакиевдин жакындарына таандык деп эсептелип, кийин улутташтырылган “Строймаркет” соода жайы шаардык муниципалитеттин менчигине өткөрүлдү. Бүгүн шаардык кеңештин кезектеги сессиясында шаар депутаттары тийиштүү токтомду кабыл алышты.

Буга чейин шаар мэриясы шаар казынасын байытып, шаардагы көйгөйлүү маселелерди чечүү максатында мурда улутташтырылган бир катар объекттерди шаардын муниципалдык менчигине өткөрүп берүү суранычы менен өлкөнүн жогорку мамлекеттик органдарына кайрылган болчу. Кыргыз өкмөтү мурда сепаратист Кадыржан Батыровго таандык болгон, кийин конфискацияланган көп кабаттүү бир турак үйүн жана “Строймаркет” соода жайын шаардын муниципалдык менчигине берүү чечимин чыгарган. Шаар депутаттары өкмөттүн токтомун колдоого алышты.

Бирок, ушул соода жайын андан ары иштетүү үчүн шаардык керек-жарак департаментине өткөрүп берүү маселесинде кыйла талаш-тартыштар жүрдү. Айрым депутаттык топтор бул соода жайын жеке кишиге өткөрүп берүүгө аракет кылышса, шаар мэри Салайдин Авазов баш болгон аткаруу бийлигинин өкүлдөрү буга караманча каршы турушуп, соода жайын ким бирөөгө ижарага берүү маселеси депутаттардын ыйгарым укуктарына кирбестигин айтып чыгышты. Кызуу талаштардан кийин депутаттар шаардык керек-жарак департаментинин башкаруусуна берүү чечимин кабыл алышты.

Эскерте кетсек, шаардык мэриянын берген маалыматына караганда, “Строймаркет” соода жайын иштетүүдөн шаар бюджетине 71 миллион сом киреше алуу пландаштырылууда.