Өткөн дем алыш күндөрү Жалал-Абад шаарында тазалоо, көрктөндүрүү максатында 1,5 миңдей киши ишембиликке чыгышты. Бул тууралуу шаар мэриясынан тазалык жана көрктөндүрүү боюнча үч алык өнөктүк боюнча штабдын мүчөсү Миргүл Эгемова билдирди.

Анын айтымында, шаардагы эмгек жамааттары, жогорку жана орто окуу жайларынын студенттери, шаар тургундары жапырт ишембиликке чыгышып, шаарда коомдук жайларды тазалоо, иретке келтирүү жана көрктөндүрүү боюнча иштерди алып барышты. Айрыкча ээсиз турган аймактар, жолдордун бойлору, атуулдар көп байыр алган жайларды тазалоого көңүл бурулду.

- Бизде бир катар ишканалар активдүүлүктү көрсөтүштү. Мисалы, “Кыргызтелеком” ААКнын Жалал-Абад облустук филиалынын, шаардык каржы бөлүмүнүн, “Жылуулук” ишканасынын эмгек жамааттары өздөрүнүн активдүүлүктөрүн көрсөтүшсө, шаардагы “Достук”, “Спутник” аймактык башкаруулардын тургундары өзгөчө демилгелүү аракеттеништи, - дейт М. Эгемова.

Эскерте кетсек, февраль айынын ортосунда шаар мэриясы жаз айларында тазалык, көрктөндүрүү, иретке келтирүү иштеринин үч айлыгын жарыялаган жана аны уюштуруу үчүн шаардык штабды түзгөн.