Жалал-Абад шаардык жаштар иштери боюнча комитети тарабынан облустук Барпы атындагы драма театрында облустук, шаардык бийлик өкүлдөрүнүн жана шаардагы окуу жайлардын студенттеринин катышуусунда жаштар жумалыгынын салтанаттуу ачылуу аземи өткөрүлдү.

Шаардык жаштар иштери боюнча комитетинин төрагасы Байышбек Ташбаевдин  айтымында, облустук деңгээлде жарыяланган жаштар жумалыгын  Жалал-Абад жаштары алгачкылардан болуп баштап олтурат.

- Бул жумалыктын негизги максаты – жаштардын патриоттуулук сезимин күчөтүү үчүн түрдүү иш-чараларды, интеллектуалдык жана спорттук мелдештерди өткөрүү, жаштардын социалдык активдүүлүгүн арттыруу, - дейт ал.

Жаштар жумалыгынын ачылуу аземинде сөз сүйлөгөн шаар мэри Салайдин Авазов жаштар күнү менен жалпыны куттуктап, шаарда болуп жаткан ар тараптуу өзгөрүүлөргө токтолуу менен жаштарды мындан ары да шаарды өнүктүрүүдө активдүүлүккө чакырды.

Жумалыктын ачылуу салтанатынын жүрүшүндө шаардагы бир катар окуу жайлардын студенттеринин катышуусунда түзүлгөн 11 команданын арасында шаардык тамашоу таймашы өттү жана  анын жыйынтыгы менен Жалал-Абаддагы №1 кесиптик лицейдин “Позитив” командасы жеңишке ээ болду.