Жалал-Абад ОИИБгы, облустук казыят жана УКМК менен биргеликте, облус  аймагында диний экстремизм жана терроризмдин алдын алуу максатында ыкчам маалыматтардын жана соттун санкциясынын негизинде, Жалал-Абад шаарынын аймагында ШИИБнүн 10-тобунун каттоосунда турган, “Хизбут-Тахрир” диний экстремисттик уюмунун активдүү мүчөлөрү жана үгүтчүлөрү жашаган 5 үйдүн даректерине таң аткан убакта эрте менен тинтүү жүргүзүлдү.

Жалал-Абад ОИИБнын басма сөз кызматынын берген маалыматына караганда, жалпысынан операция учурунда “Хизбут-Тахрир” динний экстремисттик уюмуна  тиешелүүлүгүнө шектүү болгон 5 даана китеп 1 даана баракча,  19 даана ДВД диск, 2 даана флешка, 1 даана МP3 аппараты, 1 даана видеокассета, 9 даана дептер,  2 даана ноутбук, 36 даана 16 калибрдеги ок атуучу куралдын ок дарысы, 1 даана  “BLOW  COMPACT” үлгүсүндөгү газо-травматикалык тапанчасы ( пистолети ) далил буюм катары алынып, чогултулган материалдар Жалал-Абад ШИИБнүн Тергөө бөлүмүнө өткөрүлүп берилип, соттук-теологиялык жана баллистикалык экспертиза дайындалып, тергөө амалдары жүргүзүлүүдө.

Акыркы убакта Жалал-Абад облусунда түшүндүрүү иштеринин натыйжасында бул мыйзамсыз уюмдун мүчөлүгүнөн өз эрки менен чыккандардын саны арбып барат. 7 адам  жыл башынан бери адашып калгандыгын сезип, кайрадан туура жолго салттуу ислам динине кайткандыгын мойнуна алып массалык маалымат каражаттары аркылуу жалпы журтка жар салган.