Атлантикалык океандын үстүндөгү аба мейкиндигинде “Түркмөн авиалинияларынын” “Боинг 777” учагы авариялык абалга кабылган. EZ-A777 номурлуу  аба кемеси Түркмөнстан президентин тейлейт. Окуя 2016-жылы 31-октябрда болгон.

«Боинг» EZ-A777 жүргүнчүлөрү жок Атлантадан Ашхабадга учуп келе жаткан. Учак 5-сентябрдан бери АКШда техникалык кароодо болчу. Атлантикалык океандын үстүнөн учуруп бара жатып, Исландиядан 1000 чакырым алыс аралыкта экипаж кыймылдаткычтардын биринде күйүүчү майдын деңгээли кескин түшүп кеткенин байкаган. Мындан кийин учак багытын дароо өзгөртүп, 70 мүнөттөн кийин Рейкьявик эл аралык аэропортуна конууга мажбур болгон.

Бузук жери оңдолгон соң EZ-A777 Ашхабадга 46 саатык кечигүү менен барган. Натыйжада Гурбангулы Бердымухаммедов Владимир Путин менен жолугуу үчүн Сочиге камдыкта турган башка учак менен барган.

Учурда «№1 Борт» оңдолду, дал ушул учак менен Бердымухаммедов 7-8-ноябрь күндөрү Малайзияга расмий сапары менен жөнөп кетти.