Украина Крымдагы адам укуктарынын сакталышы боюнча резолюциянын долбоорун БУУга сунуштады. Резолюция Орусияны аннексияланган жарым аралга эл аралык байкоочуларды киргизүүгө чакырат. Бул тууралуу  Франс Пресс агенттиги билдирүүдө. Документке 38 өлкө авторлук кылууда, алардын арасында АКШ, Улуу Британия, Франция дагы бар.

Резолюцияда Крымдагы жарандардын, анын ичинде крымдык татарлардын жана украиндердин укуктарынын чектелиши айыпталган. Мындан тышкары документ Орусияны крым-татарлардын Межлисин экстремисттик уюм катары таануу чечимин токтоосуз түрдө жокко чыгарууга үндөйт.

Ошондой эле жарым аралдагы адам укуктарына байланышкан абал боюнча баяндама даярдоо үчүн эл аралык байкоочуларды Крым аймагына тоскоолдуксуз киргизүүнү талап кылат.

Украинанын БУУдагы өкүлү Владимир Ельченко Крымдагы эки жарым миллион жашоочу авторитардык режимден запкы чегип, коркуп, өз укуктарын коргоо мүмүнчүлүгүнөн айрылып калганын билдирди. Орусиянын БУУдагы өкүлү Евгений Загайнов сунушталган документти бир тараптуу деп атап, Украина Орусияга каршы маалымат чабуулун күчөтүп жатат деп айыптады.

Орусия Крымды 2014-жылы референдумдан кийин аннексиялап алган. Украина менен эл аралык коомчулук добуш берүүнүн жыйынтыктарын тааныган эмес. 8-ноябрда Европа биримдигине мүчө өлкөлөрдүн каржы министрлери Крымдын аткаминерлерине карата жаны санкцияларды киргизүүгө макулдашкан.