Орусиялык расмий адамдар билдиришкендей, Орусия менен Түркия аскердик кызматташтыкты калыбына келтирип, жыл соңуна чейин өкмөттөр аралык комиссиянын жолугушуусун өткөрүүнү пландап жатышат. Орусиянын Аскердик-техникалык кызматташтык боюнча федералдык кызматынын башчысы Александр Фомин учурда жолугушууну качан жана кайсыл жерде өткөрүү маселеси талкууланып жатканын айтты.

Анын билдиришинче, комиссия НАТОго мүчө болгон Түркияга Орусиянын өндүрүшүндөгү абадан коргонуу системаларын жөнөтүү маселесин да карашы мүмкүн.

Түркия бийлигинин маалыматына ылайык, өлкөнүн башкы штабынын башчысы Хулуси Акара 1-ноябрда Москвага болгон сапары маалында орусиялык кесиптеши Валерий Герасимов менен жолугуп, Сирияда «Ислам мамлекети» экстремисттик тобуна каршы күрөшүү боюнча аскердик кызматташтыкка баруу ыктымалдыгын талкуулаган.

Анкара менен Москванын мамилеси 2015-жылдын октябрында Түркия-Сирия чек арасында түрк аскерлери тарабынан орусиялык аскер учагы атылып түшүрүлгөндөн кийин начарлап кеткен. Бирок ортодогу алака түрк аскерлеринин тобу өлкө президенти Реджеп Тайып Эрдогандын өкмөтүн кулатуу аракетин көргөндөн кийин калыбына келген.