Жалал-Абад облустук милициясынын кызматкерлери кызмат учурунда каза тапкан кесиптеши Мамасадык Турсунбаевдин үй-бүлөсүнө моралдык жана материалдык жардам көрсөтүп кайтышты. Бул тууралуу Жалал-Абад  шаардык ички иштер бөлүмүнүн башчысынын орун басары Абдыгапар Айдаров төмөндөгүдөй билдирүү узатты.

“Кесиптешибиз М.Турсунбаев көпчүлүктөн айырмаланып өзгөчө шайыр болчу. Өз кызматына жасаган тактыгынан улам хизбутчуларды кармоо учурунда окко учуп,  каза тапкан. Азыркы учурда анын үй-бүлөсүнөн жакындан кабар алып, жардам көрсөтүү иштерин жүргүзүүдөбүз”, - дейт А.Айдаров.

Кызмат учурунда хизбутчулардын колунан 45 жашында окко учкан М.Турсунбаевдин артында 3 кыз 1 уулу жана жубайы Кимсанкан Турсунбаева калган.

Ал эми үй-бүлө жүгү жана балдардын тарбиясын жалгыз мойнуна алган жубайы Кимсан айым жолдошу каза тапкандан соң бир топ кыйынчылыктарды башынан өткөргөнүн айтат.

“Атабыздан эрте ажырап, турмуштун көп соккусуна кабылдым. Балдарды окутуу, багуу, турмушту алып кетүү жалгыз бой аялга оңойго турбайт. Ошого карабастан уул, кыздарымдын баарын жогорку билимдүү кылып окутууга жетиштим. Ал учурда жолдошумдун эмгегин баалаган кесиптештери бизди бир да жолу көңүл сыртында калтырышпады. Ар бир даталуу күндөрдө келип, куран окушуп, бизден кабар алып кетишет”, - дейт маркум М.Турсунбаевдин жубайы.

Ал өз сөзүндө балдары башка кесиптин ээси болуп, атасынын жолун жолдобогонун айтып, учурда дыйканчылык менен күн көрүп жатышканын кошумчалады.

Белгилей кетүүчү жагдай, үстүбүздөгү айдын 21-майында Сузак районунда 96 мектептин катышуусунда өткөрүлчү спорттук иш-чара дал ушул милициянын старшинасы М.Турсунбаевдин жаркын элесине арналып уюштурулмакчы.