Жалал-Абад шаарынынын мэриясынын алдындагы “Кайрымдуулук” борборунун курамында белгилүү жашаган жери жок адамдарга шаар мэринин буйругу менен түнөк үйү ачылды. Бул тууралуу шаардын вице-мэри Айзат Раматиллаева билдирди.

Анын айтымында, кыш жакындаган сайын белгилүү жашаган жери жок, жардамга муктаж атуулдардын абалы оорлоп, алар ар кандай оорчулуктарга кириптер болушат. Жергиликтүү бийликтер аларга камкордук көрүүсү зарыл.

- Бул боюнча Кыргыз Республикасынын Өкмөтүнүн буйругу бар, ошол буйрукту ишке ашыруу менен биз түнөк үйүн ачып, ал 1-ноябрдан 1-апрелге чейин иштеп турат. Жашаган жери жок атуулдар кышындасы суукта сыртта калышы өтө коркунучтуу. Ошондуктан биз 20 орунга ылайыкташкан түнөк үйүн ачып, ага зарыл шарттарды камсыз кылдык, - дейт ал.

Түнөк үйүндө азырынча 5 киши түнөк алса, алардын ыңгайлуулугу үчүн кир жуугуч машина, мончо, чачтарач, керебеттер менен жууркан-шейшептер, идиш-аяктар камсыз кылынган. Бул максатта шаардык бюджеттен 213 миң сом каралып, түнөк алган атуулдарга бир жолудан ысык тамак берилет.

- Биз түнөк алган атуулдардын коопсуздугун, саламаттыгын жана таза жашоосун камсыз кылуу максатында тийиштүү шаардык кызматтарга тапшырма бергенбиз, - дейт А. Раматиллаева.