«Ислам мамлекети» экстремисттик тобунун лидери Абу Бакр аль-Багдади Ирактын Мосул шаарынан чыгып кетти. Бул тууралуу Улуу Британиянын тышкы иштер министри Борис Жонсон батыш атайын кызматтарынын маалыматтарына шилтеме кылып билдирди.

Жонсон курчоодогу шаардан чыгып кетип, бирок интернет аркылуу башкаларды Мосул үчүн күрөшүүгө чакырып жаткан ИМ тобунун лидеринин аракетин «катуу шылдың» деп атады.

Күн мурун интернетте аудиокайрылуу тараган. Анда «Ислам мамлекетинин» лидери делген адам согушкерлерди Мосул шаарын коргоого чакырган. Бул аль-Багданинин бир жыл ичиндеги алгачкы кайрылуусу болду. Буга чейин анын өлтүрүлгөнү кабарланган. Бирок жетекчилик расмий билдирүү жасаган эмес.

17-октябрда Ирактын өкмөттүк күчтөрү менен күрттөрдүн пешмерга күчтөрү 2014-жылдан бери ИМдин согушкерлеринин көзөмөлүндө турган Мосул шаарына чабуул башташкан. Аларга АКШ башында турган коалициялык күчтөр жерден жана абадан колдоо көрсөтүүдө. Эки апта ичинде Мосулга чабуул койгондор шаарга жакын бара алышты.