Акыйкатчы Кубат Оторбаев Кыргызстанда 10-сентябрды “Суицидге каршы күн” катары мамлекеттик деңгээлде жарыялоону сунуштап жатат.

Ал өлкөдө жылдан жылга өз жанын кыйгандардын саны өскөнүнө байланыштуу ушундай демилге көтөрүлгөнүн айтты.

«Биз берип жаткан сунушта бул маселенин алдын алуу боюнча алты багыт камтылган. Алар өкмөт деңгээлиндеги көзөмөл, мектептерге психологдорду тартуу, Эмгек жана социалдык өнүктүрүү министрлигинин алдында кризистик борборлорду ачуу, Ички иштер министрлигинин алдында Балдар жана өспүрүмдөр менен иштөө башкармалыгын түзүү, жергиликтүү башкаруу органдарында мигранттардын, оор шарттагы үй-бүлөнүн балдары менен иштешүү жана диний уюмдарды түшүндүрүү иштерине тартуу болуп саналат», — деди Оторбаев.

Кыргызстанда жыл сайын суицидге баргандар саны 100дөн ашат. Бул абал улам өсүп баратканын Ички иштер министрлиги билдирген.

Ал эми дүйнөдө жылына 800 миңден көп адам өзүн өзү өлтүрүүдө. Жанынан аша кечкендердин көбү 15 жаштан 29 жашка чейинкилер.

10-сентябрь – Суицидге каршы күрөштүн эл аралык күнү.