Жалал-Абад шаарындагы облустук Барпы атындагы драма театрында маданият кызматкерлеринин кесиптик майрамы белгиленип, маданият тармагынын алдыңкыларына урмат-сый көрсөтүлдү.

Майрамда сөз сүйлөгөн шаар мэри Салайдин Авазов бул жылы маданият тармагында болуп жаткан көптөгөн ийгиликтерге токтолуп, бул тармакта эмгектенип жаткан кызматкерлерди кесиптик майрамы менен куттуктады.

- Бул жылы биз шаардагы маданият кызматкерлерине чоң белек тапшырганы турабыз. Көп жылдардан бери маданият бөлүмү эскилиги жеткен, ыңгайсыз имаратта орун алып, алардын жакшы иштөөсүнө шарт түзүлбөй келген. Эми биз аларга заманбап эки кабаттуу, бардык ыңгайлуулуктары бар имаратты тартуулап жатабыз. Ошондой эле, биздин маданият кызматкерлерибиз эл аралык “Көчмөндөр оюнуна” катышып, байгелүү орундарды жеңип алышты, – деди С.Авазов.

Эскерте кетсек, облуста жалпысынан 1700дөн ашуун маданият кызматкерлери бар болсо, алардан экөө “Кыргыз республикасынын эл артисти” жана бешөө “Эмгек сиңирген артист” наамдарын алышкан.