Кыргызстанда чет өлкөлүк жарандарды милдеттүү түрдө каттаттуу системасы киргизилүүдө. Бул тууралуу ТИМдин басма сөз кызматынан билдиришти. Жаңы эреже «Тышкы миграция жөнүндөгү» мыйзамга киргизилген өзгөртүүлөрдүн кабыл алынышына байланыштуу.

2016-жылдын 4-ноябрынан тарта Кыргызстанда жүргөнүнө беш күндөн ашкан бардык чет өлкөлүк жарандар каттоодон өтүшү керек болот. Аны аткарбагандарга 10 миң сом өлчөмүндө айып пул салынат.

Жаңы эреже өлкө аймагында 30 күнгө чейин каттоосуз жүрүү укугуна ээ Орусиянын жарандарына гана тийиштүү эмес. Казакстандыктар болсо жакында эле кол коюлган келишим ратификацияланганга чейин каттоодон өтүп туруулары керек болот.

Чет өлкөлүк жарандарды каттоо Мамлекеттик каттоо кызматынын алдындагы Калкты жана жарандык абалдын актыларын каттоо органдары тарабынан жашаган жерлери боюнча ишке ашырылат.

Кыргызстандын аймагындагы дипломатиялык өкүлчүлүктөрдүн, башка өлкөлөр менен эл аралык уюмдардын консулдук мекемелеринин кызматкерлери ТИМдин Консулдук кызматтар департаментинде катталышы керек болот.