Тажикстандын чек ара аскерлигинин 27 жаштагы офицери Ооганстандан келе жаткан аткезчилерге каршылык көрсөтүү маалында каза болду. Акыркы кездери Ооганстандан Тажикстанга аткезчилик менен маңзатын алып кирүү аракеттери көп байкалууда.

Тажикстандын күч органдары чек ара аскерлигинин 27 жаштагы офицери Умеджон Хасановду өлтүргөн аткезчилердин тек-жайын аныктоо боюнча иш-чараларды жүргүзүшүүдө. Окуя 20-октябрга оогон түнү Ооганстандын Тахор провинциясы менен чектешкен Тажикстандын Хамадони районунда болгон. Офицердин туугандарынын айтымында, анын денесинде 11 октун изи бар болгон.

Тажикстандын Улуттук коопсуздук боюнча мамлекеттик комитетинин маалыматы боюнча чек арачылар быйыл 22 жолу ооган аткезчилери менен каршылашууга барышкан. Умеджон Хасанов ушул жылы аткезчилердин огунан каза тапкан алгачкы тажик чек арачысы.

Аткезчилердин жана башка кылмыштуу топтордун чектеш аймактардан өтүүсүнө жол бербөө максатында быйыл жети чек ара тозоту курулду. Тажикстан менен Ооганстандын жалпы чек арасынын узундугу 1300 чакырымды түзөт.