Жалал-Абадда кыргыз милициясынын түзүлгөндүгүнүн 92 жылдыгына карата салтанат болуп, анда өзгөчөлөнгөн кызматкерлерге сыйлактар тапшырылды.

Майрам салтанатына карата алгач  Жалал-Абад шаарынын Эркиндик аянтында милиция кызматкерлеринин парады болуп, андан кийин облустук Барпы театрында КР Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев башатаган жергиликтүү бийлик өкүлдөрүнүн, укук коргоо органдарынын жетекчилеринин, коомчулуктун катышуусунда майрамдык маанай улантылды.

Маданият кызматкерлери милиция кызматкерлерин куттуктап, өздөрүнүн концерттик программасын тартуулашты. Концерттик программадан соң, кыргыз милициясынын 92 жылдыгына карата куттуктоо сөздөр айтылып, алдыңкы милиция кызамткерлери ардак грамоталар  жана баалуу белектер менен сыйланышты.

Жалал-Абад облустук ИИБнын жетекчиси Жеңиш Жоробеков жалпы милиция кызматкерлерин КР Ички иштер министри Кашкар Жунушалиевдин атынан куттуктап, түйшүктүү иштерине ийгиликтерди каалап кетти. “Өз милдетин аткарып, кызмат учурунда 17 милиция кызматкери курман болгон. Алар өз өмүрүнөн да кызматтык милдетин жогору коюшкан”, - деди Ж.Жоробеков.