Казакстанда маданият маселелери боюнча мыйзамга өзгөртүүлөрдү киргизүү маселеси талкууланууда. Негизги көңүл гонорар жана коомдук маанилүү китептерди басып чыгарууга бурулууда.

Китептерди басып чыгаруу жана таратууда маданият министрлигинин ыйгарым укуктарын кеңейтүү сунушу берилип жатат.

Акын Олжас Сулейманов китептерди мамлекеттин коргоосуна алуу зарылдыгын билдирүүдө. Анын айтымында, 25 жыл аралыгында гонорар иретинде бир теңге да алган эмес. Ал Италиянын тажрыйбасын колдонууну сунуштоодо. Аталган өлкөдө жеке банктар кирешелеринин бир бөлүгүн көз карандысыз маданий борборлорго которуп турат.

"Бул акча классикалык адабиятты колдоого жумшалмак. Банктардын жеке кирешеси бар, анын кичине бөлүгү маданият үчүн бөлүнсө, начарлап кетишпейт", — деди акын.

“Эгер жазуучунун китеби жогорку коомдук мааниге ээ болсо, өкмөт аны сатып алат. Чыгарма үчүн гонорар төлөнүп берилет”, - деди мажилис төрагасынын орун басары Гульмира Исимбаева

Бирок айрым саясат таануучулар “коомдук мааниге ээ” адабияттарды аныктоодо мамлекеттин идеологиясы салык төлөөчүлөрдүн эсебинен жүргүзүлүп каларын, бул демократиялык коом үчүн жат көрүнүш экенин билдиришүүдө.