Жалал-Абад шаарындагы көпчүлүк өнөр жай ишканалары ички ресурстардан туура пайдаланып, эмгек өндүрүмдүүлүгүн жогорулатуунун эсебинен бош турган өндүрүштүк мүмкүнчүлүктөрдү кеңири керектелүүчү товарларды иштеп чыгууга буруу менен көп продукция алууга жетишишти. Бул тууралуу шаардын мэриясынын аткаруу комитетинин быйылкы жылдын үчүнчү чейрегинин жыйынтыктарын талкуулаган жыйынында белгилүү болду.

Тактап айтканда, өткөн 2015-жылдын 9 айына  салыштырмалуу шаардагы “Элдик” мамлекеттик ишканасы 19 миллион 15,9 миң сомдук, темир буюм иштеп чыгаруучу кичи ишканалар 17 миллион 826,0 миң сомдук, “Жалал-Абадгаз”  жоопкерчилиги  чектелген коому 15 миллион 848,7 миң сомдук, “Элнур Дан” жоопкерчилиги чектелген коому 5 миллион 289,6 миң сомдук, “Келечек” мамлекеттик ишканасынын филиалы 4 миллион 556,9 миң сомдук, “Тазалык” атайын автоунаа ишканасы 2 миллион 563,4 миң сомдук, “Ак-Алтын” жоопкерчилиги чектелген ишканасы 2 миллион 249,3 миң сомдук, нан иштеп чыгаруучу жеке ишкерлер 1 миллион 862,4 миң сомдук, “Жалал-Абадсууканал” башкармалыгы 1миллион 96,3 миң сомдук, алкоголсуз ичимдиктер иштеп чыгаруучу кичи ишканалар 1 миллион 32,8 миң сомдук, “Насос” акционердик коому 779,5 миң сомдук, кагаз иштеп чыгаруучу кичи ишканалар 529,6 миң сомдук, “Кыргыз көзү азиздер жана дүлөйлөр” окуу өндүрүштүк бирикмеси 444,4 миң сомдук, “Лесной продукт” жоопкерчилиги чектелген коому 313,6 миң сомдук жана “Алманбет”  жоопкерчилиги чектелген ишканасы 238,3 миң сомдук көп продукция өндүрүүгө жетише алышты.

Жогоруда белгиленген өнөр жай ишканалары тарабынан өткөн жылдын ушул мезгилине салыштырмалуу жалпысынан 73 миллион 646,5 миң сомдук продукция көп өндүрүлдү же шаар боюнча өндүрүлгөн продукциянын 4 пайыз көлөмүн түздү.

Ошол эле кезде мэриянын аткаруу комитети бир катар ири өнөр жай ишканаларынын өндүргөн продукциясы экспорттолбой, чыгым тартып жатышканын белгиледи жана бул абалдан чыгып кетүү жагынан ишканаларга сунуштарды берди.