Жалал-Абад мамлекеттик университетинин жыйындар залында ички иштер министрлигинин коомдук кенешинин үчүнчү көчмө жыйыны өткөрүлдү. Бул тууралуу шаардык мэриянын басма сөз кызматы билдирди.

Алынган маалыматка караганда, ага жогорку кеңештин депутаты Айнуру Алтыбаева, КР Ички иштер министринин биринчи орун басары Сүйүнбек Омурзаков жана ОБСЕнин Бишкектеги милициянын ишмердүүлүк маселелери боюнча жетекчиси Павел Халашнюк, Ички иштер министрлигинин Баткен, Ош жана Жалал-Абад облустук ички иштер башкармалыгынын жетекчилери, укук коргоочулар жана коомдук кеңештин өкүлдөрү  катышышты.

Көчмө жыйындарды өткөрүүнүн максаты - өлкөдөгү ички иштер тармагындагы жаралып жаткан маселелерди талкуулап, көйгөйлөрдү алдын алуу. Жыйындын жүрүшүндө тармактагы бүгүнкү күнгө чейинки жетишкендиктер, аны менен катар кетирилген кемчиликтер боюнча маалыматтар талкууланды.

Көчмө жыйында сөз сүйлөгөн “Эл-Пикир” коомдук илим изилдөө борборунун өкүлү Эльвира Кожомбердиеванын айтымында, өлкө боюнча калк арасында милицияга болгон ишенимди аныктоо максатында өткөрүлгөн сурамжылоонун жыйынтыгында Жалал-Абад облустук ички иштер башкармалыгы алдыңкы көрсөткүчтү ээлеген.

Жыйындын аягында облустардагы ички иштер башкармалыктарына ЕККУнун Бишкектеги өкүлчүлүгү тарабынан компьютерлер тапшырылды.