Пианист Азамат Сыдыков АКШда өткөн концертин сөөгү бир нече күн бою жерге берилбеген алабукалык баптист аялдын элесине арнады. Бул тууралуу пианист өзүнүн Фейсбуктагы баракчасына жазды.

Ал Ала-Букада жергиликтүү элдин каршылыгы менен сөөгү жерге берилбей, казылып алынып, үч жолу көмүлгөн маркум аялдын элесине Клейтондогу жеке концертин арнай турганын жазган.

“Жеке концертимди Каныгүл Сатыбалдиеванын жаркын элесине арнайм. Менин мекендешим, Кыргызстандын жараны, мээримдүү эне, аялзатына арнайм” деп жазган пианист маркумдун жакындарына көңүл айтып, мындайга жол бергени үчүн Кыргызстандын жетекчилигин сынга алды.

“Өз жарандарын коргой албаган, улуту, ишеними, расасы жана саясий көз караштарына карабай, Баш мыйзам талап кылгандай, алардын укуктарын коргоп бере албаган бийликти айыптайм” деп жазды Азамат Сыдыков.

23-октябрда АКШнын Түндүк Каролина штатындагы Клейтон фортепиано фестивалында кыргызстандык пианист Азамат Сыдыковдун жеке концерти болду.