Кыргызстан менен Казакстан мыйзамсыз миграция менен бирге күрөшүү боюнча макулдашты. Бул тууралуу келишим эки өлкөнүн өкмөттөрү арасында түзүлдү. Ага кыргыз тараптан ИИМдин орун басары Курсан Асанов, ал эми Казакстандан ички иштер министри Калмуханбет Касымов кол коюшту деп жазат inform.kz маалымат порталы.

Тараптардын бекемдөөсү боюнча келишим мыйзамсыз миграциянын агымын азайтууга өбөлгө боло алат жана Кыргызстан менен Казакстанда мыйзамсыз жүргөндөрдү кармап, мекенине кайтаруу түйшүгүн жеңилдетет.

17-октябрда Кыргызстан жана Казакстандын тышкы иштер министрлери жолугуп, эки өлкөнүн аймагында жарандардын каттоосуз жүрүү мөөнөтүн 30 күнгө чейин узартуу боюнча келишимге кол коюшкан. Буга чейин жарандардын беш күнгө чейин гана каттоосуз жүрүүсүнө уруксат берилген эле.

Аталган келишимди эки өлкө парламенттери ратификациялашы керек.