Жалал-Абад шаарында 21-22-октябрь күндөрү  КР ИИМнин демилгеси менен милициянын туңгуч генерал-майору Э.Алиевдин жаркын элесине арналган «Алыш» күрөшү боюнча ички иштер органдарынын кызматкерлеринин  арасында мелдеш болуп өттү. Бул тууралуу Жалал-Абад ОИИБнын басма сөз кызматы билдирди.

Алынган маалыматка караганда, бул мелдешке ИИМнин бардык облустардагы башкармалыгынан жана ИИМнин Борбордук аппаратынан, Э.Алиев атындагы Академиясынан, күзөт кызматынан жалпы 13 команда катышты. Мелдеш 2 күнгө созулуп атайын эл аралык даражадагы чебер калыстар тобу түзүлүп, жеңүүчүлөр 22-октябрда аныкталды.

Мелдештин баш аягына чейин катышкан КР ИИМнин Кесиптик дене тарбия жана күжүрмөн даярдык боюнча башкы башкармалыгынын башчысы,  милициянын полковниги Төрөкул Мадамов бул иш-чаранын Жалал-Абадда өткөрүлүшүн өзгөчө маанилүүлүгү, даярдыгы жана уюштуруучулугу, жогорку деӊгээлде өткөнүн  белгилеп өттү.

"Мелдештин негизги максаты - кызматкерлердин кесиптик, күжүрмөн дене-тарбиялык даярдыгын чыӊдоо, ички иштер органдарынын арасында байланыш достукту бекемдөө жана мыктыларды аныктоо болуп саналат", - деди Т.Мадамов.

Спорттук иш-чаранын жыйынтыктоочу бөлүмүнө Өкмөттүн Жалал-Абад облусундагы ыйгарым укуктуу өкүлү Кыянбек Сатыбалдиев да катышып,  келген конокторго ыраазычылык билдирип, мыкты спортчуларды акчалай сыйлык менен сыйлады. Мындан сырткары, салмак категориялары боюнча жеңүүчүлөр, калыстар жана уюштуруу тобу атайын баалуу белектер менен Жалал-Абад ОИИБнын жетекчилиги тарабынан сыйланышты.

Жалпы командалык эсеп менен 1-орунду Жалал-Абад ОИИБ, 2-орунду Талас ОИИБ, 3-орунду Ош ОИИБ камсыздашты.