Жалал-Абад шаарында Кыргыз Республикасынын социалдык коргоо жана профсоюз кызматкерлеринин кесиптик майрамы белгиленип, ушул тармактардын алдыңкыларына шаар бийликтеринин сыйлыктары салтанаттуу тапшырылды.

Жалал-Абад шаарындагы Токтосун Тыныбеков атындагы областтык филармонияда өткөн бул салтанатка  шаардын вице-мэри Турдалы Темирбаев катышып, социалдык коргоо жана профсоюз кызматкерлерин майрам менен куттуктады.

Анын айтымында, Жалал-Абад шаарындагы социалдык коргоо тармагында 66, социалдык фонд тармагында 25 киши эмгектенип, шаардагы социалдык жактан аярлуу жарандарга жакындан жардам көрсөтүү, алардын социалдык укуктарын ишке ашырууну камсыз кылуу жаатында иштеп келе жатышат.

Майрамдык салтанаттын жүрүшүндө өз ишин мыкты аткарган бир катар кызматкерлерге атайын шаар мэриясынын жана шаардык кеңештин Ардак граматалары тапшырылды. Майрамдык салтанатты областтык филармониянын жана шаардын маданият сарайынын өнөрпоздорунун чоң программадагы концерти коштоду.