“Мекеним менин –Кыргызстан” долбоорунун алкагында Жалал-Абад шаарынын мектептер арасында “Милициянын жаш досу” аттуу кароо-сынак болуп өттү. Бул тууралуу Жалал-Абад  шаардык мэриясынын социалдык бөлүмүнүн жетектөөчү адиси Салтанат Алтынбекова билдирди.

Анын айтымында, бул сынакты уюштуруунун эң негизги максаты – жаш  өспүрүмдөрдү кылмыштуулуктан арылтуу, мекенди сүйүүгө, ага ак кызмат кылууга, мекенчилдик сезимин күчөөтүгө, ошондой эле спорт менен да машыгып, милициянын жаш досу болууга үндөө болуп эсептелет.

- Учурда сынакка шаар ичиндеги 19 мектеп катышып жатат. Бул жерден жеңген окуучулар облустук, анан республикалык деңгээлге чейин жолдомо алышат. Айта кетсек, былтыркы жылга салыштырмалуу жаш-өспүрүмдөр арасында 9 айдын жыйынтыгы менен кылмыштуулук азайды, бул да болсо жаш өспүрүмдөр менен иштөө инспекциясы окуучулар  менен тыгыз байланышта болгондугун айгинелейт, - дейт С. Алтынбекова.

Белгилей кетсек, быйылкы жылы Жалал-Абад облусунун бардык район – шаарларында орто мектептердин окуучуларынын арасында "Милициянын жаш досу" деп аталган кароо- сынактар өтүүдө.