Укук коргоочу Азимжан Аскаровдун ишин караган соттук териштирүү кийинкиге жылдырылды. Буга сотко төрагалык кылган Чүй облустук сотунун судьясы Кыдык Жунушпаевдин ооруп калганы себеп болгон. Бул тууралуу Чүй облустук сотунан кабарлашты.

Маалыматка ылайык, сот Аскаров 2010-жылы июнь окуясында улуттук кастыкты козуткан, массалык башаламандык уюштурган жана милиция кызматкери Мыктыбек Сулаймановду мыкаачылык менен өлтүрүүгө катышкан деген айып менен өмүрүнүн акырына чейин эркинен ажыратылган.

Быйыл жазында БУУнун Адам укуктары боюнча комитети ал мыйзамсыз камалганын айтып, Аскаровду бошотууну талап кылган. Аталган уюмдун сунушунун негизинде Жогорку cот 12-июлда ишти жаңы ачылган жагдайларга байланыштуу деген негизде кайра карап, өзүнүн жана Жалал-Абад облустук сотунун өкүмдөрүн жокко чыгарган. Ишти кайра кароону Чүй облустук сотуна тапшырган.