Өткөн апта соңунда Казакстандын сенаты (парламенттин жогорку палатасы) Тажикстан менен стратегиялык кызматташтык тууралуу келишимди ратификациялады. Стратегиялык өнөктөштүк тууралуу документке эки өлкө өткөн жылдын 14-сентябрында, Нурсултан Назарбаевдин Дүйшөмбүгө болгон расмий сапары маалында кол коюшкан.

Казакстан сенатынын басма сөз кызматынын расмий билдирүүсүндө документте тараптар бири-бирине каршы багыттала турган күч колдонуудан кармануу жана башка өлкөнүн суверендүүлүгү менен аймактык бүтүндүгүнө коркунуч жаратчу келишимдерди түзбөө милдеттенмелерин ырастай тургандыктары айтылат.

Сенаттын пленардык жыйынында Казакстандын тышкы иштер министринин биринчи орун басары Мухтор Тлеуберди документте саясий диалогду өркүндөтүү, эки тараптуу мамилелер жана эл аралык актуалдуу көйгөйлөр боюнча позицияларды макулдашуу маселелери камтыларын айтты.

«Жакынкы Чыгыштагы окуялардын, Ооганстандагы абалдын, ошондой эле террористтик уюмдардын ишмердүүлүгүнүн активдешүүсүнүн фонунда Казакстан Борбордук Азиядагы, өзгөчө Ооганстан менен түздөн-түз чектешүү менен КМШнын түштүк чектеринде калкан болуп турган Тажикстанда туруктуулуктун болушуна кызыктар», - деди ал.

Өткөн жылдын декабрында аталган документти Тажикстандын парламенти ратификациялаган. Өлкө ТИМи документ 13 пункттан турарын жана анда коопсуздукту, тынчтыкты жана туруктуулукту камсыздоо жана бекемдөө, жаңы коркунучтар менен чакырууларга каршы күрөшүү, аскердик жана аскердик-техникалык кызматташтыкты өнүктүрүү каралганын билдирген.