Казакстандын Башкы прокуратурасы Петропавловскта көз жумган баскетболчунун өлүмүн иликтөөнү өз көзөмөлүнө алганын билдирди.

Башкы прокуратура Игорь Нанаевдин жакын туугандарына көңүл айтып, жакынкы күндөрү басма сөз жыйыны өтөрүн, анда Ички иштер департаменти менен облус прокуратурасы коомчулукту түпөйүл кылган бардык суроолорго жооп берерин баса белгиледи. Бул иш ички иштер министринин жана башкы прокурордун жеке көзөмөлүнө алынды.

Петропавловсктагы “Барс” баскетбол клубунун 23 жаштагы оюнчусу Игорь Нанаев шаардык көңүл ачуу комплексиндеги уруштан кийин катуу жаракат алып, ооруканага түшкөн. Ал ошол бойдон эсине келбей, 10-октябрда көз жумган.

Буга чейин Түндүк-Казакстан облусунун полиция башчысынын орун басары Нанаевдин өлүмүнө байланыштуу 21 жаштагы жарандын кармалганын маалымдаган.