Жапониянын Тышкы иштер министрлиги Токио Курил жээктериндеги талаштуу аралдарды бирге башкаруу сунушу менен Москвага кайрылган деген билдирүүлөрдү четке какты.

Жапониянын негизги позициясы өзгөргөн жок: Токио төрт аралдын кимге таандык экендиги маселесин чечүүнүн негизинде Орусия менен тынчтык келишимин түзөт, деп билдирди жапон ТИМинин өкүлү. Бул тууралуу Reuters агенттиги кабарлады.

Буга чейин Nikkei гезити Жапония премьер-министри Синдзо Абэ Орусия президенти Владимир Путин менен төрт Курил аралын бирге башкаруу тууралуу келишим түзүү мүмкүндүгүн талкуулоону каалап жатканын жазган.

Акыркы жолу эки лидер бул маселени сентябрдын башында Владивостокто өткөн Чыгыш экономикалык форумунда талкуулашкан. Анда Абэ Москваны ымалага келүүгө чакырган. Путин Орусия талаштуу аралдарды Жапонияга сатып же өткөрүп бербей турганын билдирген.

Экинчи дүйнөлүк согуштун аягында СССР басып алган Курил жээктериндеги төрт аралга байланышкан талаш-тартыш көп жылдан бери эки өлкө ортосундагы алаканы оорлотуп, алардын тынчтык келишимге кол коюшуна мүмкүндүк бербей келет