АКШнын мамлекеттик катчысы Жон Керри менен британ тышкы иштер министри Борис Жонсон Лондондо жолугушуп, Орусияны Сирия жаңжалын токтотууга көмөктөшүүгө үндөштү.

Жолугушуудан соң Борис Жонсон Лондон менен Вашингтон Асад жана анын союздаштарына басым жасоону улантуу керек деп эсептей тургандыгын билдирди. Британ дипломатия башчысынын айтымында, Сирияда жасалган аскердик кылмыштар үчүн жооптуулар Эл аралык сотто жооп бериши керек.

Британ министри Европа өлкөлөрүндө Сириядагы согушка кийлигишүү каалоосу жок экенин белгиледи.

Борис Жонсон Асаддын режими менен анын орусиялык союздаштарынын Алепподо көзөмөл орнотуп, согушту жеңип чыга тургандыктарынан шек саноодо. Ал Орусия менен Иранды жаңжалды токтотуу боюнча аракеттерде лидерликти көрсөтүүгө чакырды. Жон Керри АКШ союздаштары менен Сирия боюнча жаңы санкцияларды киргизүү ыктымалдыгын караштырып жаткандыгын ырастады, бирок санкциялардын объектиси катары Орусияны атаган жок.