Жалал-Абад шаарында кышка даярдык иштери аягына чыгууда. Бул тууралу шаар мэриясынын тийиштүү бөлүмдүн жетекчиси Миргүл Эгемова билдирди.

Анын айтымында, 2016-2017-жылдардагы күз-кыш мезгилине карата даярдык көрүү максатында  Жалал-Абад шаарынын мэриясынын атайын токтому чыгып, негизги аткарылуучу иш-чаралар белгиленген. Ошонун негизинде бүгүнкү күнү кышка карата даярдануу чаралары аяктап жатат.

-Азыркы учурда шаар тургундарынын көмүр жана отунга болгон керектөөлөрүн камсыз кылуу максатында  4 көмүр жана отун сатуу түйүндөрү ачылган. Аталган түйүндөр Пушкин, Темир жол көчөлөрүнүн бойлорунда, ошондой эле “Береке”, ”Айти” базарларында жайгашкан. Ал эми көп кабаттуу үйлөрдү жылуулук менен үзгүлтүксүз камсыз кылуу үчүн 46 отказан жана 23 отканаларды капиталдык жана утурумдук ремонттон өткөрүүгө шаар казынасынан 12 миллион 367 сом акча каражаты каралган, - дейт ал.

Алынган маалыматка караганда, азыр шаардагы Жеңижок көчөсүндөгү №19 жана Вокзальная көчөсүндөгү №19 үйдү борбордук жылуулук түйүнүнө кошуу иштери жүргүзүлүп жатат.