Жалал-Абад облустук үй-бүлөлүк медицина борборунун, шаардагы медициналык жамааттын жана шаар бийликтеринин чогуу жасаган аракеттеринин аркасында энелердин саламаттыгы жагынан кыйла алга жылыштар болуп жатат.Бул тууралуу облустук үй-бүлөлүк медицина борборунун жетекчисинин орун басары Хадича Пратова билдирди.

- Өткөн 2015-жылы шаардын калкынын саны 95 миң 790 киши болсо, 2016-жылдын 9 айында 96 миң 725 адамды түздү. Анын ичинен аялдардын саны былтыр 48 миң 638 болсо, быйылкы жылдын 9 айында 49 миң 592ге жетти. Эң негизгиси, 2015-2016-жылдары бизде энелер өлүмү катталган жок.Бул биздин гана эмес, республиканын сүйүнүчү десем болот, - дейт ал.

Ошондой эле, Х.Пратова 2016-жылы бир жашка чейинки балдардын өлүмү 7,7 пайызга азайганын да билдирип, энелер жана жаш балдар өлүмүнүн алдын алуу боюнча ар кандай түшүндүрүү иштери жүрүп жатканын, ушул жылы 1200 кош бойлуу аялдарга камсыздандыруу күбөлүгү алынып берилгенин, аз кандуулук боюнча 320 аялга рецепт жазылып берилгенин кошумчалады.