Жалал-Абад шаарындагы №9 инновациялык мектебинин педагогикалык жамааты бүгүн, 10-октябрь күнү шаар мэри Салайдин Авазов менен болгон жолугушууда андан дагы бир мөөнөткө шаардын мэри катары иштеп беришин суранышты. Ал эми шаар мэри бул маселени шаардын шайлоочулары чече турганын билдирди.

Шаардык мэриянын басма сөз кызматынын берген маалыматына караганда, кийинки 2017-жылга шаар бюджетин, аткарыла турган иштердин багыттарын так аныктап алуу максатында шаар мэри С. Авазов шаардагы эмгек жамааттары менен болгон жолугушууларын баштады. Жолугушууда мугалимдер шаардын жакшы жагына өзгөрүп жатканын белгилешип, тротуарларды жакшыртуу, тазалыкка көңүл буруу, “Спутник” кичи районунда эс алуу зонасын куруу сыяктуу сунуштарды айтып чыгышты.

Анан да мугалимдер шаар мэринин жакшы иштеп жатканын белгилешип, шаарда дагы бир мөөнөткө ушул кызматта иштеп беришин суранышты. Буга шаар мэри бардык маселелени шайлоочулар чече турганын билдирди.

- Бизде баарын эл чечет, ким кай жерде иштеши керек болсо, ал да элдин таразасына салынат. Жергиликтүү кеңештин шайлоолорунда кайсы партия элдин ишенимин көп алып, көп мандатка ээ болсо, ошол партия шаардын мэрин шайлап алат. Ошону үчүн тандоо жагы элге берилген, - деди ал.

Эскерте кетсек, Жалал-Абад шаарынын мэри С. Авазов 2014-жылы сентябрь айында шаардык кеңештин 31 депутатынын 30нун добушу менен шаар мэри болуп шайланган. ​​​