Россиянын Анапа шаарында болуп өткөн кикбокс боюнча өспүрүмдөр арасындагы дүйнөлүк мелдеште Кыргызстандын атынан барып, чемпиондукту жана байгелүү орундарды ээлешкен жаш спортчуларды Жалал-Абад шаарынын Курманбек дарбазасынан шаардын коомчулугу чоң салтанат менен тосуп алышты.

Намыска жараган жаш спортчуларды тосуп алуу учурунда Жалал-Абад шаарынын социалдык маселелер боюнча вице-мэри Турдалы Темирбаев, Жалал-Абад облустук ички иштер башкармасынын башчысы Жеңиш Жоробеков, ошондой эле шаардагы Экономика жана ишкердик университетинин ректору Абдилбает Мамасыдыков куттукташты.

Дүйнөлүк мелдеште биринчи орунду багыткан Мурзаканов Шамилге, экинчи орунду алган Касымов Мирбекке ийгиликтерди каалашып, келген жетекчилер өздөрүнүн белектерин тапшырышты. Ал эми Экономика жана ишкердик университетинин ректору А.Мамасыдыков бул жаш спортчулардын аталган окуу жайда акысыз билим алышына шарт түзүлгөнүн билдирди.  

- Россияда өспүрүмдөр арасында спорттун кикбокс түрү боюнча мелдеште Жалал-Абаддын спортчулары биринчи жана экинчи орунду багынтып келишти. Бул эки спортчубуз №1 спорт мектебинде 7 жылдан бери машыгып келе жатышат, экөө тең аябай аракетчил балдар, түнү-күнү дебей чемпионатка даярдык көрүшкөн эле, эми минтип акыбети кайтып олтурат. Сыйлык бул жигиттердики болсо, сыймык биздики. Ар дайым спротчуларыбыз менен сыймыктанабыз, - дейт жаш спортчулардын машыктыруучусу Алишер Акимбаев.