Жалал-Абад шаарындагы Тойгонбай Кошматов атындагы №10 мектеп-гимназиясынын мугалимдери жана окуучулары  Тарых жана маданият жылына карата аткарылуучу бир топ иштерди белгилешип, анын ишке ашырылышын камсыз кылышууда. Бул тууралуу Жалал-Абад шаардык мэриясынын маалымат борбору билдирди.

Аталган мектептин башталгач классынын мугалими Акылай  Исмаилованын айтымында, быйылкы жыл Тарых жана маданият жылы деп белгилеген себептүү окуучуларга тарыхты жана маданиятты кеңири үйрөтүү мүмкүнчүлүгү түзүлүүдө. Бул багытта аталган  мектепте бир топ маданий иш-чаралар өткөрүлдү.

“Айта кетсем, бүтүрүүчү класстар арасында “Сармерден” сынагы болуп өттү. Ал эми бешинчи класстан сегизинчи класска чейинки окуучулар арасында  “Акыл ордо”  акыл таймашы жүрүп, 5-А класстан Төрөмаматов Мирбек, 7-А класстан Абдыжапар уулу Руслан күч сынашып, жогорку класстын окуучулары башталгыч класстын окуучуларына куурчак оюндарын көрсөтүштү. Андан сырткары, окуучулар Ош шаарында жайгашкан Сулайман-Тоого саякат жасашып, өздөрүнүн жан дүйнөлөрүн байытып келишти. Ошондой эле, Сузак районунун Калмак-Кырчын айылындагы Курманбек баатырдын күмбөзүнө, Советтер Союзунун Баатыры Тукубай Тайгараевдин музейине барып, баатырдын таржымалы менен кеңири таанышып келишти, - дейт А.Исмаилова.

Эскерте кетсек, аталган мектепте 75 мугалим 985 балага татыктуу билим-тарбия берип келе жатышат.

"Көк-Арт Инфо" маалымат борбору.