Жалал-Абад шаар аймагында 9 ай ичинде 66 өрт кырсыгы катталып, өрттөн келтирилген материалдык зыян 6 миллион 101 миң 615 сомду түздү. Бул тууралуу маалыматты Жалал-Абад шаардык өрткө каршы мамлекеттик кызмат бөлүмүнүн башчысы Кубанычбек Токтосунов билдирди.

Анын берген маалыматына караганда, Жалал-Абад шаардык өрткө каршы мамлекеттик кызмат бөлүмүнүн кызматкерлери тарабынан шаардын аймагында жайгашкан мамлекеттик жана чарбалык объектилерде, ошондой эле жеке менчик мекеме, уюм, ишканаларда, атуулдардын турак жайларында өрт кырсыктарын алдын алуу жана өрт коопсуздугун камсыз кылуу мамксатында 2016-жылдын 3 квартал ичинде өрткө каршы профилактикалык иш-чаралар жүргүзүлгөн.

- Биздин бөлүм тарабынан жергиликтүү бийлик органдарына 48 жолу маалыматтар берилген. Чарбалык объектилерде, турак жайларда өрт кырсыктарын алдын алуу багытында чарбалык объектилердин кызматкерлери менен 47 лекция жана 210 өрттүн алдын алуу боюнча инструктаждар өткөрүлдү. Ал эми күжүрмөн даярдыктагы кызматкерлердин өрттү өчүрүүдөгү ыкчам аракеттеринин натыйжасында 15 миллион  90 миң сомдук материалдык баалуулуктар сакталып калды,- дейт ал.